-- ADVERTISEMENT --

BUTUAN CITY – Mitaliwan na sa laing kalibutan sa edad nga 46 anyos ang kanhing PBA star nga si Peter June “PJ” Simon.

Kalit na lamang kining nawad-an og panimuot samtang nagdula sa usa ka exhibition game sa Davao City niadtong Biyernes, Nobyembre 20.

Human sa pipila ka minutos nga pagpalingkod aron mopahulay, kalit na lamang kining nawadan og panimuot.

Gidala pa siya sa San Pedro Hospital sa Davao City, apan wala na kini makaabot nga buhi.
Nailhan si Simon sa mga angga nga “The Scoring Apostle” ug “SuperSub”.

Nagduwa siya sulod sa 17 ka season sa PBA isip kabahin sa Purefoods franchise, diin nakatabang siya sa koponan nga makakab-ot og walo ka kampeonato.

-- ADVERTISEMENT --

Lakip niini ang Grand Slam nga nasakmit sa koponan niadtong 2014, sa wala pa siya miretiro sa propesyonal nga basketball niadtong 2020.

Lumad nga taga-Makilala, North Cotabato, si Simon una nga nagdula alang sa Davao Eagles sa wala pa nakasulod sa PBA niadtong 2004.

Walo ka higayon usab siyang napili isip All-Star player, samtang sa ulahi, giretiro sa iyang koponan ang iyang jersey nga adunay numero 8 isip pagpasidungog sa iyang kontribusyon sa basketball.

Bisan miretiro na sa PBA, nagpadayon gihapon siya sa pagdula og basketball sa Mindanao. Niadtong 2024, siya usab ang nagdumala sa regional program sa Pilipinas Super League nga nagtumong sa pagtabang ug pagpalambo sa mga kabatan-onan nga adunay hilig sa basketball.