-- ADVERTISEMENT --

BUTUAN CITY- Lauman na usab sunod simana ang rollback sa presyo sa mga produktong petrolyo sa nasud, diin posibleng mokunhod og P2.47 matag litro ang gasolina, P2.67 ang diesel ug P1.88 ang kerosene.

Base sa upat ka adlaw nga Mean of Platts Singapore kom MOPS trading, resulta ang rollback sa sobra nga suplay sa petrolyo tungod sa pagkunhod sa panginahanglan, lakip na ang pagdaghan sa eksport sa China kansa nakaapekto sa presyo sa lana sa merkado sa Asya.

Bisan pa sa nagpadayon nga tensiyon sa Strait of Hormuz human sa bag-ong pag-atake sa Estados Unidos sa Qeshm Island sa Iran, nakatabang gihapon sa pagpaubos sa presyo sa krudo ang pagpadayon sa pagbiyahe sa mga barkong nagkarga og lana pinaagi sa alternatibong mga ruta.

Namatikdan usab nga mas ubos gamay ang rollback nga gipatuman sa Department of Energy sa miaging semana kumpara sa unang gipaabot nga pagkunhod sa presyo, samtang gimandoan ang mga kompanya sa lana nga mosunod sa kalkulasyon sa ahensya tungod kay nagpabilin ang Pilipinas ubos sa State of National Energy Emergency.