BUTUAN CITY – Nagsugod na ang panahon sa paglalin sa mga red crab sa Christmas Island sa Australia, diin minilyon ka gagmay’ng pula nga alimango ang matag tuig nga mobiya sa ilang pinuy-anan aron moadto sa baybayon.
Ang Christmas Island National Park naghatag og adlaw-adlaw nga livestream sa paglalin sa mga alimango gikan sa gitawag nga Red Crab Bridge. Kini usa ka taytayan nga may gitas-on nga 16 ka piye nga gitukod aron luwas nga makatabok ang mga alimango sa usa ka dalan nga daghang sakyanan ang moagi samtang nagpadulong sila sa baybayon.
Kasagaran magsugod ang maong paglalin inig-abot sa unang ulan sa ting-ulan sa isla, nga kasagarang mahitabo sa Oktubre o Nobyembre, apan usahay malangan pa hangtod Disyembre o Enero. Mogawas ang mga alimango gikan sa kalasangan diin sila nagpuyo ug magpanaw padulong sa baybayon alang sa ilang tinuig nga pagpangitlog ug pagpangitlogay.
Matod sa website sa parke, ang eksaktong panahon ug kakusog sa ilang paglalin nagdepende sa hugna sa bulan.
Kasagarang mangitlog ang mga red crab sa wala pa mosubang ang adlaw, panahon nga nagsugod na ang paghubas sa taas nga tubig sa dagat atol sa kataposang hugna sa bulan. Talagsaon usab nga nahibaloan nila kung kanus-a mobiya sa ilang mga lungag aron maabtan ang hustong panahon sa pagpangitlog.
Tungod sa maong paglalin, temporaryong gisirhan ang pipila ka dalan sa isla aron mapanalipdan ang mga alimango samtang nagtabok. Bisan pa niini, daghang turista ang mobisita matag tuig aron masaksihan ang maong talagsaong panghitabo sa mga pampublikong lugar sama sa Drumsite, Flying Fish Cove, Ethel Beach ug Greta Beach.
Samtang, ang Parks Australia nagpadagan og livestream gikan sa Red Crab Bridge sulod sa usa ka oras kada adlaw, nga magpadayon hangtod matapos ang paglalin sa minilyon ka red crab.












