BUTUAN CITY – Gi-angkon sa Saudi-led military coalition nga nakaguba sila og 60 ka target militar sa Houthi rebels sa nagkalain-laing bahin sa Yemen atol sa ilang gihimong operasyon kaganina.
Sumala sa tigpamaba sa koalisyon nga si Turki al-Maliki, lakip sa mga giatake ang mga pasilidad sa mga rebelde sa mga probinsiya sa Sanaa, Hodeidah, Amran ug Saada.
Lakip sa mga gilaglag ang mga tunnel sa kabukiran nga giingong gigamit sa pagtipig sa ballistic missiles, ingon man ang mga pasilidad alang sa pag-assemble ug pagtipig sa mga unmanned aerial vehicle o drones.
Tumong sa maong operasyon nga pahuyangon ang kapasidad militar sa Houthi rebels, ilabina ang ilang abilidad sa paglunsad og mga missile ug drone attacks nga giisip nga hulga sa seguridad sa rehiyon ug sa mga ruta sa komersiyal nga paglawig sa kadagatan.
Ang Saudi-led coalition dugay nang nagsuporta sa internasyonal nga giilang gobyerno sa Yemen batok sa Houthi rebels nga mikontrolar sa kapital nga Sanaa sukad 2014.
Samtang, wala pa magpagawas ang koalisyon og detalyadong impormasyon sa posibleng ihap sa mga namatay ug nasamdan atol sa maong operasyon. Wala usab kini ma-independently verify sa laing tinubdan.












