BUTUAN CITY- Gipakusgan sa Department of Health kon DOH Eastern Visayas ang kampanya batok sa dengue pinaagi sa pagpalig-on sa 4S strategy human misaka og 110 porsiyento ang natala nga kaso sa maong sakit sa rehiyon.
Giawhag sa ahensya ang publiko nga aktibong moapil sa pagpugong sa pagkaylap sa dengue pinaagi sa kanunay nga paglimpyo sa palibot, pagwagtang sa mga nagtapok nga tubig kansa posibleng mahimong pamugaran sa mga lamok, paggamit og mga pamaagi aron malikayan ang ilang pinaakan, ug magpakonsulta dayon sa doktor kung makasinati sa mga sintomas sama sa hilanat, sakit sa ulo ug kalawasan.
Pinaagi sa 4S strategy nga naglakip sa Search and destroy mosquito-breeding sites, Self-protection measures, Seek early consultation, ug Support fogging or spraying sa mga lugar nga adunay pagtaas sa kaso, tumong sa DOH nga mapugngan ang dugang nga pagkaylap sa sakit ug malikayan ang mga komplikasyon ug pagkamatay tungod sa dengue.












