BUTUAN CITY – Patay ang walo ka mga tawo samtang 19 ang angol human nahugmak ang 3-andanas nga bilding sa Flatbush Avenue, Brooklyn, New York. Sumala sa New York City Fire Department, upat sa mga na-angol ang anaa sa kritikal nga kondisyon ug padayon nga gitambalan sa ospital.
Nagpadayon usab ang search and rescue operations sa lugar aron masuta kung aduna pa bay mga tawo nga natanggong ilalom sa mga nahugno nga bahin sa dakbalay.
Lakip sa mga naluwas ang usa ka mabdos nga babaye nga buhi nga nakuha gikan sa nahugno nga estruktura.
Base sa inisyal nga impormasyon, tapad sa maong bilding ang usa ka construction site diin gihimo ang excavation work kon pagkalot sa yuta.
Gi-imbestigahan na sa mga otoridad ang posibleng hinungdan sa insidente.
Nagpadayon hangtod sa tibuok gabii ang operasyon sa mga rescue personnel sa pagpangita sa posibleng mga naluwas bisan pa sa delikadong kahimtang sa lugar.
Gilauman usab nga posibleng maka-apekto sa nagpadayong rescue operations ang kusog nga ulan, dalugdog ug kilat.
Padayon ang imbestigasyon aron matino ang hinungdan sa pagkahugno sa maong bilding nga adunay mga residential apartment.
