BUTUAN CITY- Malampusong nakasulod sa quarterfinals sa Hong Kong Tennis Open si Filipina tennis star Alexandra “Alex” Eala human niini gipildi ang Czech player nga si Tereza Valentova sa iskor nga 6-4, 7-6(7).
Dili sayon ang duwa alang kang Eala human nakabawi si Valentova gikan sa iyang unang pagkalabaw sa opening set ug nakapugos pa og tiebreak sa ikaduhang set.
Apan, napabilin nga kalmado ang Filipina player ug nakadaog sa importanteng mga puntos aron maselyohan ang kadaugan.
Sa ikaduhang set, hapit pa maangkon ni Valentova ang kadaugan human makalabaw sa iskor nga 5-3, apan nakahimo og sunod-sunod nga puntos si Eala aron makabawi ug mapadayon ang duwa ngadto sa tiebreak.
Bisan pa sa pagsulay sa iyang kontra nga makapadayon sa duwa, nakadaog si Eala sa kataposang duha ka puntos aron makuha ang kadaugan.
Gi-angkon ni Eala, nga lisod kaayo ang ilang panagsangka ug gidayeg usab niini ang maayong duwa nga gipakita ni Valentova, apan nagpahayag klini og kalipay tungod sa iyang pagkadaog.
Sunod nga atubangon ni Eala sa quarterfinals ang Croatian player nga si Antonia Ruzic alang sa pagtinguha nga makasulod sa semifinals sa maong torneo.
