BUTUAN CITY – Usa lang sa 102 ka mga indibidwal nga anaa sa transport sector kinsa gipa-ilalom sa ‘Oplan Undaspot’ drug test sa Philippine Drug Enforcement Unit kon PDEA-Caraga kgahapon, ang nagpositibo sa ilegal nga druga.
Sigon ni PDEA-Caraga spokesperson Dindo Abellanosa, ang 102 gilangkuban sa mga drivers ug conductors sa pampublikong sakyanan sama sa bus, van, taxi, traysikol ug dyip nga anaa sa Langihan Premium Bus Terminal ug sa Robinson’s Terminal.
Sa 50 ka mga drivers ug conductor sa Langihan Premium Bus Terminal, usa lang ka conductor ang nagpositibo sa random drug test samtang pulos negative sa maong test ang mga anaa sa Robinson’s Terminal.
Dako ang pagpasalamat sa opisyal sa koordinasyon sa hingtungdang mga drivers ug conductors tungod kay target matud pa sa ilang ahensya nga wala’y driver o kaha conductor nga positibo sa ginadiling druga ang makahatud sa ilang mga pasahero sa bisan asang lugar sa Mindanao ilabina dinhi sa Caraga Region.
Dugang pa ni Abellanosa, ang nagpositibong conductor, ilang tabangan uban sa lokal nga kagamhanan diin siya nagpuyo ug sa ubang hingtungdang ahensya sa gobyerno aron makalingkawas gikan sa iyang sitwasyon tungod kay biktima matud pa siya.
Kini ilabina nga wala siya nadakpan nga nagpayuhot og ginadiling druga.
