BUTUAN CITY- Mokabat sa 6,486 ka personnel ang ipakatap sa mga sementeryo ug estratehikong lugar sa tibuok Caraga Region gikan Oktubre 30 hangtod Nobyembre 2, 2026, aron masiguro ang kalinaw ug kaluwasan sa publiko atol sa pag-obserbar sa All Saints’ Day ug All Souls’ Day, sumala ni Police Regional Office 13 (PRO13) Director PBGen Rolindo Suguilon.
Sa kinatibuk-ang ihap, 4,941 ang mga personnel sa Philippine National Police (PNP), 694 gikan sa ubang unipormadong ahensya, ug 851 ka force multiplier.
Mokabat sa 2,099 ka personnel ang magbantay sa 230 ka Police Assistance Desk nga nahimutang sa 194 ka pampublikong sementeryo, 13 ka pribadong sementeryo ug siyam ka memorial park, samtang ang uban ipakatap sa mga simbahan, dagkong karsada, terminal, destinasyon sa mga turista, mobile patrol ug checkpoint aron mapugngan ang krimen, mahapsay ang dagan sa trapiko ug mahatagan dayon og tabang ang publiko.
Giawhag usab ang mga residente ug bisita nga i-download ang A.G.A.P. Caraga mobile application aron dali nga makontak ang labing duol nga estasyon sa pulisya, makadawat og mga pahimangno bahin sa kaluwasan ug makapangayo og hinanaling tabang kon gikinahanglan.
