BUTUAN CITY – Gipasabot ni Presidential Communications Office (PCO) Secretary Lino Cayetano nga gibase sa panginahanglan sa publiko ang desisyon ni Pangulong Ferdinand Marcos Jr. nga ibalhin si Secretary Vince Dizon sa Department of Transportation (DOTr) ug itudlo si Secretary Banoy Lopez isip bag-ong kalihim sa Department of Public Works and Highways (DPWH).
Sigon ni Cayetano, tumong sa presidente nga masiguro ang malungtarong pagpatuman sa mga reporma sa DPWH, lakip na ang mga lakang alang sa transparency ug ang pagkompleto sa mga proyekto nga dugay nang wala pa mahuman.
Dugang pa ni Cayetano, nagtuo ang presidente nga angay si Lopez, nga usa ka accountant ug abogado, sa pagpalig-on sa mga sistema sulod sa DPWH.
Samtang gilauman nga tutokan ni Dizon ang pagpahapsay sa adlaw-adlaw nga biyahe sa mga commuters, pagsulbad sa taas nga mga linya sa Land Transportation Office (LTO), ug pagpadali sa mga dagkong proyekto sa transportasyon.
Gipili matud pa sa presidente ang duha ka kalihim base sa misyon nga gusto niyang matuman alang sa katawhang Pilipino.
