BUTUAN CITY- Masinati na ning mga taknaa, ang bag-ong kausaban sa presyo sa petrolyo, diin misaka og P1.20 matag litro ang diesel ug 50 sentabos usab matag litro ang kerosene, samtang mikunhod og 30 sentabos ang gasolina, sumala sa Department of Energy (DOE), ug magpabilin kini hangtod Nobyembre 2.
Giklaro sa ahensya nga ang kausaban sa presyo naimpluwensiyahan sa paglihok sa presyo sa lana sa tibuok kalibotan ug sa mga pagpit-os sa suplay tungod sa panagbangi sa Middle East.
Samtang, gipahibalo sa Saudi Arabia atol sa Singapore International Energy Week nga magsugod sa tunga-tunga sa 2027 ang pagtipig sa krudo sa Jurong Rock Caverns sa Singapore aron mapalig-on ang kasaligan sa suplay sa lana sa Southeast Asia ug ang seguridad sa enerhiya sa Singapore, ilabina kon adunay pagkabalda sa suplay.
Gipasalig usab ni Saudi Energy Minister Prince Abdul Aziz Bin Salman Al Saud nga magpadayon ang gingharian sa paghatag og kasaligan nga suplay sa enerhiya bisan pa sa nagpadayong tensiyon sa rehiyon. Ang Singapore International Energy Week gipahigayon gikan Oktubre 26 hangtod 30.
