BUTUAN CITY – Padayon pa ang gihimong imbestigasyon sa kapulisan sa Talacogon, Agusan del Sur sa natigayong pagpamusil kaganinang alas-dos sa kaadlawon sa Purok Anthurium, Barangay San Agustin nga mikutlo sa kinabuhi sa usa ka 15-anyos nga estudyanteng bayong-bayong samtang laing duha ang angol.
Gi-ila ang namatay nga si alyas Franco, residente sa maong barangay kinsa gidala pa sa ospital apan gideklarang dead on arrival.
Samtang ang mga angol nailang si Leah Mea, 23-anyos, residente sa Brgy Coalicion ug 13-anyos nga si alyas Martin, residente sa Barangay Nuevo, parehong sakop sa lungsod sa San Luis, sa susamang lalawigan ug padayon pang nagpa-alim sa maong ospital.
Base sa inisyal nga imbestigasyon sa kapulisan, pauli na unta ang mga biktima human mitan-aw og konsyerto.
Gisuta pa sa kapulisan kung tinuod ang gika-ingong samtang nagbaktas ang mga biktima, ila matud pang gisinggit-singgitan ug gibato ang sakay sa duha ka motorsiklong milabay kanila nga ila pang gigukod.
Pag-abot sa unahan, misipa na ang mga buto sa armas ug dinhi na nagbuy-od ang 15-anyos nga bayong-bayong.
Igo na lang usab nga nag-iyagak sa paghilak ang iyang inahan nga daling naka-abot sa dapit nga nahitabuan.
