BUTUAN CITY – Magpahigayon og tulo ka adlaw nga pig holiday ang Agricultural Sector Alliance of the Philippines kon AGAP partylist sugod karong adlawa Oktubre 22 hangtod Sabado, Oktubre 24, isip protesta sa padayong pagka-alkansi sa lokal nga industriya sa pagpamaboy ug sa pagdagsa sa imported nga karne sa baboy.
Gipahibalo ni AGAP Party-list Representative Nicanor “Nikki” Briones nga boluntaryong dili magpagawas ug magbaligya og baboy sa merkado ang mga hog raisers nga mu-apil sa maong kalihokan.
Sumala ni Briones, mokabat sa 350 milyon pesos kada adlaw ang gibanabanang mawala sa panudlanan sa mga lokal nga magbababoy tungod sa taas nga production cost ug kompetisyon gikan sa imported nga baboy.
Kauban sa ilang mga panawagan ang pagpataas pag-usab sa taripa sa imported pork ngadto sa 30 porsyento alang sa in-quota imports ug 40 porsyento alang sa out-quota imports, temporaryong pagpahunong sa pag-isyu sa import permits, ug mas hugot nga pag-monitor sa mga imported meat products.
Gilauman usab nga mokabat sa 800 ka hog raisers gikan sa nagkada-iyang bahin sa nasud ang mu-apil sa rally atubangan sa Department of Agriculture sa Quezon City ugmang adlawa Biyernes, Oktubre 23, aron ipadayag ang ilang mga panginahanglan ug panawagan sa gobyerno.
