BUTUAN CITY- Gisugdan na sa Department of Agriculture (DA) ang pag-iimbestiga sa mga imported nga karne sa baboy aron masuta kung na-apektuhan ug nalugi ang mga lokal prodyuser.
Sumala ni Agriculture Secretary Francisco Tiu Laurel Jr., aduna silay nakita nga hinungdan aron susihon kini ubos sa Safeguard Measures Act. Sakop sa imbestigasyon ang mga fresh, frozen, ug uban pang produktong baboy gikan 2021 hangtud Agosto 2026.
Pipila sa mga nakitang hinungdan sa imbestigasyon mao ang pag-ubos sa kita ug presyo sa ipangbaligya sa mga lokal nga prodyuser, ingon man ang pagdaghan sa mga gitipigan nga imported nga karne sa nasud.
Giklaro usab sa DA nga wala pay gipahamtang nga buwis o taripa sa pagkakaron. Kinahanglan una kining tun-an og maayo aron pamatud-an kung ang mga imported nga produkto ang hinungdan sa pag-antos sa mga lokal nga prodyuser .
Kadaghanan sa gi-import nga karne gikan sa European Union (EU), pati na sa Brazil, Spain, Canada, Netherlands, ug United States. Nakig-alayon na ang DA sa Department of Foreign Affairs aron abisuhan ang mga maong mga nasud ug pangayo-on ang ilang reaksyon.
