BUTUAN CITY- Pito ka overseas Filipino workers (OFWs) ang angol sa mga pag-atake sa King Khalid International Airport sa Riyadh, Saudi Arabia, diin tulo kanila ang anaa sa kritikal nga kahimtang, sumala sa Department of Foreign Affairs kon DFA ning adlaw’ng Lunes.
Ang maong pag-atake nga nahitabo niadtong Oktubre 10 gikataho nga miresulta sa kamatayon sa labing menos 12 ka tawo ug pagka-angol sa kapin 300 pa.
Nakigtambayayong na usab ang DFA ug Department of Migrant Workers (DMW) sa mga awtoridad sa Saudi Arabia aron masiguro ang gikinahanglang medikal nga pag-atiman ug tabang sa mga nasamdan.
Giawhag usab sa gobyerno sa Pilipinas ang tanang partido nga undangon ang panag-away ug pilion ang malinawon nga pagsulbad sa panagbangi pinaagi sa dayalogo ug diplomasya.
Samtang, giawhag ang mga Pilipino sa Saudi Arabia nga mosunod sa mga pahimangno sa lokal nga awtoridad ug kanunay makigkontak sa Philippine Embassy sa Riyadh ug Philippine Consulate General sa Jeddah.
Gikumpirma usab sa Overseas Workers Welfare Administration (OWWA) nga 34 ka OFW ang nakauli sa Pilipinas kaganiha, samtang gilauman ang pag-abot sa laing 65 ka OFW ugmang adlawa Martes, Oktubre 20, 2026. Gipahimangnoan na kaniadto sa mga diplomatikong misyon sa Pilipinas ang mga Pilipino sa Saudi Arabia nga magmatngon ug mag-amping tungod sa nagpadayong tensiyon sa rehiyon.
