BUTUAN CITY – Gikasubo sa Filipino Nurses United ang pagkibhang og 6.4-bilyunes pisos sa 2027 budget sa Department of Health nga dakong problema unya sa paghatag og medical services ngadto sa mga kabus nga katawhang adto mudangop sa mga public hospitals.
Sa eksklusibong pakighinabi sa Bombo Radyo Butuan, gipadayag ni Filipino Nurses United President Jocelyn Andamo nga imbes dugangan ang pundo sa mga ospital, gikuhaan na hinuon ilabina ang alang sa ilang operasyon.
Wala matud pa huna-hunaa sa mga magbabalaud nga ang labing ma-apektuhan niini mao ang kabus nga katawhan nga nagsalig lang sa serbisyo sa mga pampublikong ospital. Kung seryuso matud pa ang gobyerno pagtutok sa kaayuhan sa kinabag-ang katawhan, dapat gi-una niini ang public health services.
Dugang pa ni Andamo, dili malimod sa administrasyon nga ang pagdugang sa budget alang sa Medical Assistance for Indigent and Financially Incapacitated Patients kon MAIFIP, magpakusog gihapon sa political patronage sa mga kongresista ug uban pang mga public officials ilabina niadtong nangandam na alang sa 2028 local and national elections.
Kini tungod kay mu-adto man gihapon ang mga mangayo og hinabang ngadto sa opisina sa mga pulitiko sama sa Assistance to Individuals in Crisis Situation kon AICS sa Department of Social Welfare and Development kon DSWD.
