BUTUAN CITY – Gi-awhag sa World Health Organization (WHO) ang nagkalain-laing nasud sa kalibotan nga mobalhin gikan sa dugay nga pagpabilin sa mga pasyente sulod sa mga psychiatric hospital ngadto sa mas personal ug community-based nga pag-atiman sa kahimsog sa pangisip.
Sa bag-ong praktikal nga giya nga gilusad sa WHO, gipadayag nga kapin sa usa ka quarter sa mga pasyenteng na-admit sa mga pasilidad sa pangisip ang nagpabilin didto sulod sa kapin sa unom ka bulan, samtang hapit katunga sa mga pasyente ang dugay nga gipabilin sa mga pasilidad nga supak sa ilang kabubut-on. Tungod niini, giklaro sa organisasyon ang panginahanglan nga mapanalipdan ang kagawasan, dignidad ug tawhanong katungod sa mga tawo nga nanginahanglan og suporta alang sa ilang mental health.
Sumala ni WHO Director-General Dr. Tedros Adhanom Ghebreyesus, dili angay nga kinahanglan isakripisyo sa usa ka tawo ang iyang kagawasan o dignidad aron lamang makadawat og padayon nga pag-atiman sa kahimsog sa pangisip.
Naglatid ang bag-ong giya og mga konkretong lakang alang sa mga nagdumala sa psychiatric hospital aron maminusan ang dugay nga pagpabilin sa mga pasyente, mapanalipdan ang ilang tawhanong katungod ug matabangan silang makabalik ug makaangay pag-usab sa katilingban.
May kalabotan sa World Mental Health Day, gipasiugda usab sa WHO nga importante ang aktibong partisipasyon sa mga tawo nga adunay personal nga kasinatian sa mga problema sa mental health sa paghimo sa mga polisiya ug programa. Kinahanglan usab nga masiguro ang ilang access sa puy-anan, serbisyong panglawas ug mga oportunidad sa trabaho aron mas sayon ang ilang pagbalik sa komunidad.
Sumala sa WHO, siyam lamang ka porsiyento sa mga nasud nga naghatag og datos ang hingpit nang nakapatuman sa community-based mental health care. Tungod niini, giawhag sa organisasyon ang mga gobyerno sa tibuok kalibotan nga paspason ang mga reporma sa sistema sa pag-atiman sa mental health ug ibalhin ang dugang nga pamuhunan ngadto sa mga serbisyo nga anaa mismo sa mga komunidad.
