BUTUAN CITY – Gisalikway sa Malacañang ang pamahayag ni Atty. Mans Carpio nga nadamay lamang siya sa impeachment trial batok sa iyang asawang si Vice President Sara Duterte, apan mi-uyon sila sa iyang pag-ampo nga mugawas ang kamatuoran.
Una nang gibutyag ni Carpio nga tungod kay wala’y makita nga isyu batok sa iyang asawa, hinungdan nga siya na ang nadamay sa kontrobersiya dayong butyag nga nag-ampo sila nga matapos na ang mga isyung gi-atubang sa ilang pamilya.
Apan sumala ni Palace Press officer Undersecretary Claire Castro, gusto usab sa mga Pilipino nga mabutyag ang kamatuoran tungod kay wala’y angayang itago ug wala’y angayang paboran sa imbestigasyon, lakip na ang mga paryente, higala ug kaalyado sa mga nalambigit, kon adunay ebidensiyang magkutay kanila sa mga gika-ingong anomaliya.
Kini dayong butyag nga ang maong pag-ampo kinahanglan sabayan sa pagtuo sa tinuod nga Diyos.
Madumdumang sa ika-37 ka adlaw sa impeachment trial, gipresenta sa prosecution witness nga si Atty. Alexander Cabrera ang iyang pagtuki nga nagbana-bana sa gika-ingong unexplained wealth ug wala madeklarang mga kabtangan nila Vice President Sara Duterte ug Carpio nga mokabat sa 817.87 million pesos. Ang maong kantidad gibase sa pagtuki nga gipresentar sa prosekusyon ug dili pa angay isipon nga pinal nga hukom batok sa mga nalambigit.
