BUTUAN CITY- Mingbyahe na padulong sa Singapore si President Ferdinand Marcos Jr. alang sa usa ka working visit gikan Oktubre 7 hangtod 11, human kini gi-invite ni Prime Minister ug Minister for Finance Lawrence Wong, sa tumong nga mapalawoman pa ang relasyon sa Pilipinas ug Singapore, ilabina sa ekonomiya, digital technology, green economy, smart infrastructure, artificial intelligence, renewable energy ug healthcare.
Sa iyang pagbisita, motambong si Marcos sa 24th Forbes Global CEO Conference diin gilauman kining makigkita sa mga lider sa negosyo ug ipresentar ang mga oportunidad sa pagpamuhunan sa Pilipinas ngadto sa kapin 470 ka business leaders.
Gilauman usab nga mobisita ang presidente sa Singapore Nuclear Research and Safety Institute aron mas masabtan ang teknolohiya ug safety measures sa nuclear energy, samtang gi-host usab kini ni Wong sa panihapon atol sa Formula One Singapore Grand Prix 2026.
Sumala sa Department of Foreign Affairs, ang maong pagbisita maghatag og higayon sa Pilipinas nga mapalig-on ang koordinasyon sa Singapore ug mapalapad ang mga partnership sa nagkalain-laing sektor, ilabina samtang nangandam ang nasud sa pagdawat sa ASEAN Chairmanship.
Gibanabana nga mokabat sa 220,000 ka Pilipino ang nagpuyo ug aktibong nag-amot sa paglambo sa ekonomiya sa Pilipinas ug Singapore, bisan pa og wala pay nahibal-an ang DFA bahin sa eskedyul sa presidente alang sa Filipino community atol sa pagbisita niini.
