BUTUAN CITY – Nadiskubrehan nga sekretong gipagawas gikan sa prisuhan ang usa ka Indonesian nga magtutudlo nga nahukmang sad-an sa sekswal nga pag-abuso sa usa ka estudyante sa usa ka Islamic boarding school.
Kini bisan og wala pa mahuman ang iyang sentensiya human siya nahukman og pito ka tuig nga pagkabilanggo sa hinapos nga bahin sa tuig 2022.
Si Moch Subchi Azal Tsani, o Bechi, mao ang anak sa usa ka impluwensiyadong lider sa Islam ug ang iyang kaso, nakapakurat sa daghang mga tawo sa Indonesia, usa ka nasud nga kadaghanan Muslim diin minilyon ka mga ginikanan ang nagpadala sa ilang mga anak sa Islamic boarding schools.
Gidakop siya niadtong 2022 sa eskwelahan sa iyang amahan sa East Java, diin siya nagtudlo. Nahitabo kini human sa 15 ka oras nga paglihok nga gi-apilan sa dul-an 1,000 ka mga riot police.
Daghang mga supporters sa iyang pamilya ang nagtigom aron pugngan ang iyang pagdakop. Sa ulahi nianang tuiga, gisentensiyahan siya og pito ka tuig nga pagkabilanggo.
Gikuha sa gobyerno ang lisensya sa eskwelahan sa pag-operate, apan nanginlabot si kanhi Presidente Joko Widodo aron magpadayon ang operasyon niini sa rasong, ang kaso may kalabotan sa usa ka indibidwal ug dili sa tibuok institusyon.
Apan nakadiskubrehan sa imbestigasyon ang dugang nga mga alegasyon batok sa46-anyos nga si Bechi, ug mga ebidensiya nga nagpakita nga ang eskwelahan ug ang iyang pamilya misulay sa pagpahilom o pagpugong sa mga alegasyon batok kaniya.
Ang sayo ug sekretong pagpagawas kang Bechi nahitabo samtang ang National Commission on Violence against Women nagpasidaan nga adunay “emergency” sa sekswal nga kapintas sulod sa mga Islamic boarding schools.
