BUTUAN CITY – Gipatas-an sa United States Federal Reserve ang interest rates sa unang higayon sulod sa kapin tulo ka tuig, ug posible pa kining dugangan aron mapugngan ang padayon nga pagsaka sa presyo sa mga palaliton ug serbisyo.
Gipatas-an ang interest rate ngadto sa 3.75% hangtod 4%, gikan sa 3.5% hangtod 3.75%, pinaagi sa unanimous decision sa Federal Reserve bisan pa sa kusog nga pagsupak ni US President Donald Trump, nga nanawagan nga ipaubos unta ang interest rates.
Matud ni Fed Chair Kevin Warsh, gihimo ang desisyon tungod kay taas pa kaayo ang inflation ug dugay na kining nagpabilin nga taas. Iyang gihulagway ang lakang isip usa ka ma-ampingon ug responsable nga desisyon.
Tungod sa mas taas nga interest rates, mas mahal ang pagpangutang alang sa mga tawo nga manginahanglan og loans, housing mortgages ug credit cards. Apan, mahimo usab kini nga mosangpot sa mas taas nga kita gikan sa savings.
Matud pa ni Warsh, bisan adunay optimism ang liderato sa Fed, nagpabilin gihapon nga problema ang inflation.
Human sa anunsyo, mipadayag si Trump og suporta kang Warsh apan nagbutyag nga ang ubang miyembro sa Fed board nga mibotar sa interest-rate decisions, kontra kaniya.
Ang tumong sa Federal Reserve, sama sa ubang central banks, mao ang pagpabilin sa inflation sa 2% o ubos pa niini. Apan sumala ni Warsh, sobra na sa lima ka tuig nga mas taas sa maong target ang inflation sa Estados Unidos
