BUTUAN CITY – Nakig-alayon na ang Department of Agriculture kon DA-Caraga ngadto sa ubang ahensya sa ilang departamento aron makabaton og mga lakang nga maminusan ang epekto sa super El Niño phenomenon ilabina diha sa mga basakan ug mga isdaan.
Sigon ni DA-Caraga Regional Executive Director Ricardo ‘Bong’ Oñate Jr, nakigkutay na sila sa Bureau of Soil and Water Management aron ma-aksyunan ang mga lugar nga karon pa lang, grabe na ang epektong hatud sa maong phenomenon ngadto sa ilang lugar.
Sama matud pa sa Dinagat Island province, nagpadala sila og mga personahe base na sa hangyo sa probinsyal nga panggamhanan aron mupahigayon unya og cloud seeding.
Dugang ni Oñate, importante ang sayong pag-andam aron mapanalipdan ang mga mag-uuma ug mga mangingisda batok sa posibleng kakulang sa tubig ug uban pang epekto sa grabeng kainit ug hulaw.
Gipunting niini nga apil sa mga gi-andam nga intervention ang paghatag og angay nga suporta sa mga mag-uuma, lakip ang mga pamaagi sa pagdumala sa tubig ug pagpili sa mga tanom nga mas makalahutay sa uga nga kondisyon.
Gitan-aw usab ang mga lakang aron maminusan ang epekto sa taas nga temperatura sa mga isdaan ug uban pang pangisdaan.
Sa pagkakaron, gilibot una sa ilang mga sakop ang ilang mga operational service pumps ug mga makina aron kung mu-abot na ang pundo alang sa fuel subsidy, ma-una nila ang mga operational nga mga shallow tube well ug mga open service pumps.
Matud ni Oñate, padayon ang koordinasyon sa DA ug sa mga partner nga ahensya aron masiguro nga andam ang mga komunidad ug dali nga mahatagan og tabang ang mga apektadong mag-uuma ug mangingisda kung mosamot ang epekto sa El Niño.
