BUTUAN CITY – Gipahibalo ni kanhi British Prime Minister Sir Keir Starmer nga mobiya na siya isip Member of Parliament kon MP aron ipunting ang iyang panahon sa mga isyu may kalabotan sa internasyonal nga mga kalihokan.
Tungod niini, magpahigayon og by-election o piniliay alang sa bakanteng pwesto sa London constituency sa Holborn and St Pancras, nga dugay nang balwarte sa Labour Party kondiin si Starmer maoy nagrepresentar niini sukad niadtong tuig 2015.
Una nang gibtuyag ni Starmer nga magpabilin siya isip MP hangtod sa sunod nga UK general election nga gikatakdang ipahigayon sa 2029.
Apan sa usa ka kalit nga pahibalo, pipila lang ka oras sa wala pa ang unang pag-atubang sa iyang mipuli nga si Andy Burnham sa House of Commons, gipadayag ni Starmer nga mobiya na siya isip MP aron motutok sa mga isyu sama sa internasyonal nga relasyon ug pagbatok sa kapintas batok sa kababayen-an ug mga batang babaye.
Gidayeg usab ni Burnham ang iyang gisundan, ilabina ang trabaho ni Starmer alang sa Ukraine ug ang Hillsborough Law, usa ka balaodnon nga gihimo ubos sa iyang administrasyon aron mapalig-on ang pagpanubag sa mga opisyal sa gobyerno kansa padayon pang gihisgutan ug giproseso sa Parliament.
