BUTUAN CITY-Mikabat na sa 32 ka tawo ang namatay samtang kapin 8 milyon ka mga Pilipino o bugti sa 2.3 milyon ka pamilya ang naapektuhan sa hiniusang epekto sa Habagat ug mga bagyong Luis, Maymay ug Neneng, sumala sa Office of Civil Defense (OCD) niadtong Sabado.
Kadaghanan sa mga namatay nalambigit sa pagkalumos, pagkahugno sa yuta ug bato, pagkahagsa sa kahoy ug pagkakuryente, samtang 19 usab ang nasamdan ug tulo ka tawo ang padayong gipangita.
Labing minus 25,800 ka mga residente ang nagpabiling nagpuyo sa mga evacuation center, samtang misaka sa P6.11 bilyon ang kadaot sa imprastraktura ug P2.32 bilyon sa agrikultura, uban sa dul-an 3,000 ka balay nga nadaot, lakip ang 349 nga hingpit nga naguba.
Miabot na usab sa 117 ka lokal nga kagamhanan ang nagdeklara og state of calamity, samtang P1.65 bilyon na ang ayuda nga gipagawas sa gobyerno, taliwala sa padayong pagkakusog sa Habagat tungod sa presensya sa usa ka low pressure area sulod sa Philippine Area of Responsibility nga nagdala og lapad nga pagbaha sa nagkalain-laing bahin sa nasud.
