BUTUAN CITY – Gikumpirma ni Roselyn Exaure, tigpamaba sa lokal nga kagamhanan sa Cabadbaran City, sakop sa lalawigan sa Agusan del Norte nga legit ang post kalabot sa hulgang pagpamusil sa pipila ka mga tunghaan rason sa pagsuspende sa face-to-face classes sa tanang level sa mga public ug private schools sukad pa kagahapon Huwebes hangtud karong adlawa, Biyernes.
Sa eksklusibong pakighinabi sa Bombo Radyo Butuan, gipadayag niini nga gipatuman ang maong class suspension human ang gihimong emergency coordination meeting ni Mayor Judy Chin Amante ngadto sa mga school principals uban sa Department of Education Cabadbaran City schools superintendent ug hepe sa Cabadbaran City Police Station nga si LCol Edsel Caramonte ug uban pang mga opisyal. Sa maong tigom, ilang gihisgutan ang mga lakang nga angayang buhaton human nakumpirma sa kapulisan nga tinuod ang sunod-sunod na nga online threat posting sa social media diha sa mga tunghaan.
Kini bisan pa man sa gamay nga problema sa page diin kini gi-post human nasuta nga inactive na ang administrator niini rason nga wala na siya’y kontrol sukad niadtong tuig 2023 ug dili na niya ma-delete ang post sa mga anonymous netizens.
Bisan pa man, gipadayon gihapon sa kapulisan ang ilang imbestigasyon ug sa pinaka-ulahing katikaran, duna na sila’y gipanubayan karon nga lead sa mong hulga.
Giklaro pa sa opisyal nga duha ka adlaw lang ang maong class suspension aron dili mabalda ang padayong imbestigasyon sa kapulisan ug dili usab mabutang sa alanganin ang kinabuhi sa mga estudyante, mga magtutudlo, ilang staff ug ubang mga stakeholders.
Giklaro usab niini nga dili tinuod ang una nang nabani-og nga duna matud pa’y nakumpiskang armas gikan sa usa ka estudyante dihang misulod kini sa usa sa ilang mga tunghaan.
