BUTUAN CITY – Lima ka mga tawo ang angol lakip ang usa nga kritikal ang kahimtang, human ang pagpamusil sa Virginia State University (VSU) diin gitu-uhang daghang suspek ang nalambigit.
Sigon sa unibersidad, mitubag ang mga pulis sa insidente gawas sa usa ka residence hall pasado alas-1:28 sa kaadlawon – lokal nga oras kondiin napalgan ang lima ka biktima, nga adunay samad pinusilan ug gidala sa mga lokal nga ospital.
Upat kanila ang adunay samad nga dili peligroso sa kinabuhi.
Sumala sa lokal nga kapulisan, gituohang labaw sa usa ang gunman ang nalambigit sa pagpamusil, apan wala pa’y nadakpan.
Gi-lift na ang temporaryong lockdown sa campus, apan nagpabilin ang dakong presensya sa mga law enforcement personnel sa lugar.
Gipangunahan sa Chesterfield County Police ang imbestigasyon, uban sa tabang sa ubang lokal nga kapolisan ug campus police.
Ang Virginia State University adunay kapin 5,000 ka mga estudyante ug nahimutang kapin 32 kilometros sa habagatan sa Richmond, ang kapital sa Virginia.
Ang VSU usa sa mga historically Black colleges and universities sa Estados Unidos, mga institusyong gitukod aron mahatagan og higayon sa taas nga edukasyon ang mga African American nga kaniadto kadaghanan gidid-an sa pag-eskwela sa ubang kolehiyo.
