BUTUAN CITY – Suspendido na ang face-to-face classes sa tanang elementary ug high schools sa pampublikong tunghaan sa Cabadbaran City sukad pa niadtong Miyerkules tungod sa grabeng ka-init sa panahon.
Sa eksklusibong pakighinabi sa Bombo Radyo Butuan, gipadayag ni city government spokesperson Roselyn Exaure nga migawas sa monitoring sa Department of Education kon DepEd City Division Office sa nagkada-iyang tunghaan sa siyudad, nga duna na’y mga batang gipangsunggo ug gipanghilantan tungod sa grabe ka-init sa panahon nga gika-alarma sa lokal nga kagamhanan.
Gideklara ang suspensyon sa klase human gipatawag nga emergency meeting ni Mayor Judy Chin-Amante ka-uban ang ilang City Health Officer, Department of Education kon DepEd City Division Superintendent, hepe sa ilang Bureau of Fire Protection ug sa City Disaster Risk Reduction and Management Office.
Gipanghinaut na lang sa city government nga musunod sa maong class suspension ang mga private schools.
