BUTUAN CITY- Gipahayag ni Atty. Mary Helen Zafra, Litigation lawyer, ang iyang dakong pagsupak sa posibleng pag-postpone pag-usab sa Barangay ug Sangguniang Kabataan Elections o BSKE, nga gikatakdang ipahigayon karong Nobyembre 2, 2026.
Sumala ni Zafra, bisan og adunay awtoridad ang Kongreso ubos sa Konstitusyon sa pagtakda, pag-usab o pag-postpone sa termino sa mga opisyal sa barangay ug SK, dili kini absolute o walay limitasyon tungod kay adunay katungod ang katawhan sa pagpili sa ilang mga lider.
Gikwestyon usab niini, kung kinsa ang posibleng makabenepisyo kung dili na usab madayon ang eleksyon, ilabina nga sumala kaniya, bisan non-partisan ang BSKE, adunay mga lugar sama sa Surigao del Sur diin nalambigit ang mga lokal nga opisyal sa pagpili o pagsuporta sa mga kandidato.
Gisupak usab niini, ang rason nga dako ang magasto sa eleksyon, tungod sumala sa iyang gikutlo nga pahayag ni COMELEC Chairman George Erwin Garcia, aduna nay gigahin nga pondo alang sa eleksyon.
Gani, alang kang Zafra, mas angay nga ipadayon ang Barangay ug SK Elections karong Nobyembre 2026 aron mapanalipdan ang katungod sa katawhan sa pagpili sa ilang mga opisyal ug mahulipan na ang dili maayong liderto o kurap nga mga SK Chairman ug mga Barangay Officials.
