BUTUAN CITY – Mi-abot sa 1,487 ka mga pasahero ang apektado sa pagkansela onse ka mga flights kagahapon sa Butuan City Airport human nakasinati og runway excursion ang Flight 786 sa Cebu Pacific Airlines nga padulong unta sa Manila, hinungdan sa pagka-disable sa maong eroplano.
Sa eksklusibong pakighinabi sa Bombo Radyo Butuan, gibutyag ni Engr. Junelito Abrazado, ang area manager sa Civil Aviation Authority of the Philippines kon CAAP-Caraga, apektado sa flight cancellation ang walo ka mga flights sa Cebu Pacific ug tulo usab sa Philippine Airlines.
Sigon sa opisyal, dihang iyang nadawat ang abiso gikan sa airport personnel, dali niyang gi-activate ang ilang Incident Command System ug gihatagan og dinaliang assistance ang mga pasahero gikan sa ilang pagkaon hangtud na sa paghatud nilang gustong madayon ang ilang flights ug gipanghatud sa Cagayan de Oro City ug Davao City nga libre ang transportasyon.
Giklaro usab sa opisyal nga wala’y natalang angol ug wala usa’y nadamyos sa maong insidente kondiin mi-abot na kagabii ang Black Hawk helicopter nga maoy nagdala sa mga CAAP personnel gikan sa ilang sentrong buhtan nga maoy nanguna sa pagbira sa maong eroplano.
Padayon usab ang pagtrabaho sugod kagabii aron ma-extract na ang nasangpit nga eroplano gikan sa nahimutangan niini sa ingon mabalik na sa normal ang flight karong adlawa.
