BUTUAN CITY- Misaka og 0.20 porsyento ang Philippine Stock Exchange index (PSEi) ngadto sa 6,290.35 puntos niadtong Biyernes tungod sa bargain-hunting ug positibong resulta sa pipila ka kompanya, samtang ang Philippine peso mihuyang batok sa US dollar tungod sa pipila ka risgo sa ekonomiya.
Misaka usab ang All Shares Index og 0.15 porsyento ngadto sa 3,418.40 puntos, uban sa Property, Mining and Oil, Holding Firms ug Services nga nakarekord og pag-uswag, samtang mikunhod ang Financials ug Industrial sectors.
Bisan pa sa pagsaka sa merkado, mipahimangno ang Philstocks Research nga nagpabiling maampingon ang sentimyento sa mga mamuhunan tungod sa nagpadayong risgo. Sa merkado sa foreign exchange, mitapos ang piso sa P60.90 matag US dollar, mas huyang kumpara sa P60.81 niadtong Huwebes.
Sigon ni Rizal Commercial Banking Corporation chief economist Michael Ricafort, usa sa mga hinungdan sa pagkahuyang sa piso mao ang mas hinay nga pagtubo sa lokal nga ekonomiya sa ikaduhang kwarter sa tuig ngadto sa 2.3 porsyento gikan sa 2.8 porsyento sa miaging kwarter, dugang sa pagsaka sa presyo sa krudo sa international market ug pagkunhod sa gross international reserves ngadto sa $103.4 bilyon sa kataposan sa Hulyo 2026.
Gilauman ni Ricafort nga ang piso maglihok tali sa P60.80 ug P61.00 matag dolyar karung adlawa Lunes Agosto 10, 2026.
