BUTUAN CITY- Gilunsad sa Department of Health-Negros Island Region kon DOH-NIR niadtong Biyernes sa Sibulan ang Measles-Rubella Supplemental Immunization (MRSI) campaign, diin gitumong nga maprotektahan ang kapin 437,586 ka mga bata sa Negros ug Siquijor batok sa measles ug rubella.
Sumala ni Provincial Health Office chief Dr. Liland Estacion, gipili ang Sibulan isip lugar sa paglunsad tungod sa kadaghan sa mga gagmayng bata sa lungsod. Sa seremonyal nga pagbakuna, gihatagan og measles-rubella vaccine ug Vitamin A ang mga bata, samtang giawhag sa mga awtoridad ang mga ginikanan nga ipabakuna ang ilang mga anak bisan pa man sa ilang naunang vaccination history.
Sigon sa World Health Organization consultant nga si Dr. Mohammed Reazul Hasan, ang ikatulong hugna sa nasudnong kampanya, nga ipahigayon gikan Agosto 10 hangtod 28, nagtumong nga maabot ang kapin 6.2 milyon ka mga bata nga nag-edad og 6 hangtod 59 ka bulan sa Visayas ug ubang bahin sa Luzon, uban ang tumong nga makab-ot ang labing menos 95 porsyentong immunization coverage.
Gipahayag usab ni Estacion nga nagpabiling measles-free ang Negros Oriental, bisan pa nga adunay mga gidudahang kaso nga gisusi; siyam ka swab samples ang gisumite alang sa laboratory testing, diin duha ang negatibo, upat ang naghulat pa sa resulta, ug tulo ang wala na kinahanglana og testing tungod kay wala nakatuman sa case definition.
