BUTUAN CITY – Gikuwestiyon sa kampo ni Atty. Manases “Mans” Carpio ang pag-otorisa ni Pangulong Ferdinand Marcos Jr. (PBBM) sa Bureau of Internal Revenue (BIR) nga ipagawas ang ilang income tax records sa Senate impeachment court.
Sumala sa opisyal nga pamahayag sa kampo ni Carpio kagahapong Biyernes, Hulyo 31, gipamugos ni Carpio nga dapat ipailalom sa judicial review ang nahimong pag-apruba sa pangulo aron maseguro kung nasunod ang mga tukmang proseso sa ilalom sa balaod.
Sumala sa iyang legal team, ang pagpagawas sa taxpayer information ug ang paggamit sa executive authority dapat susihon og maayo base sa nagtunhay nga constitutional og statutory framework sa nasud.
Gitumbok sa kampo ni Carpio nga walay bisan unsang indikasyon o opisyal nga taho gikan sa BIR nga sila ni Vice President Sara Duterte dunay wala gibayarang buwis o tax assessment deficiency.
Gitin-aw niini nga ang pagpasa sa mga dokumento sa Senado usa ka administratibong lakang lang apan ang kantidad ug pagdawat niini isip ebidensya bugtong ang Senate Impeachment Court lang ang dunay katungod nga magdisesyon base sa Konstitusyon, tukmang pamalaod og Rules sa Impeachment Court.
Gihimo ni Carpio ang pamahayag human gi-aprubahan sa pangulo ang hangyu sa korte nga ablihan ang tax records sa magti-ayon may kalabutan sa reklamong unexplained wealth batuk kang VP Sara.
Bisan paman sa pagkuwestiyon sa legalidad sa kamanduan sa Pangulo, gipaneguro pa gihapon ni Carpio nga padayon nilang irespeto ang gahum sa Senado ug musunod sila sa mga legal nga proseso sa pagtaral.
