BUTUAN CITY- Misaka ang Philippine Stock Exchange index (PSEi) ug milig-on usab ang piso batok sa US dollar niadtong Miyerkules tungod sa bargain hunting ug positibong pagsalig sa mga mamumuhunan.
Misaka ang PSEi og 0.78 porsiyento ngadto sa 6,353.04 puntos, samtang ang All Shares index mitaas og 0.59 porsiyento ngadto sa 3,447.34 puntos. Nag-una sa pagsaka ang Holding Firms, gisundan sa Property, Industrial, Financials ug Services, samtang ang Mining and Oil lamang ang mikunhod.
Sumala sa Philstocks Research, nakahatag usab og positibong epekto ang pahayag ni Bangko Sentral ng Pilipinas (BSP) Governor Eli Remolona nga dili pa gilauman ang agresibong paghugot sa monetary policy sa duol nga panahon.
Bisan pa niini, nagpabiling mabinantayon ang mga investors tungod sa tensyon tali sa Iran ug Estados Unidos ug sa umaabot nga polisiya sa US Federal Reserve.
Samtang, milig-on ang piso ug misira sa ₱61.41 batok sa matag US dollar gikan sa ₱61.61 sa miaging adlaw, uban sa trading volume nga misaka ngadto sa USD1.62 bilyon.
