BUTUAN CITY- Kasamtangan gihapong apektado ang kapin 370,000 ka indibidwal o kapin 80,000 ka pamilya human sa pagnamastamas ni bagyong Kiyapo sa nasud.
Kahinumdumang tulo ka adlaw na ang minglabay sukad minggawas gikan sa teritoryo sa Pilipinas ang bagyo niadtong sayo sa kabuntagon sa Sabado, Hulyo 25. Mingresulta kini og grabe nga pagbaha ug pagkahugno sa yuta sa pipila ka parte sa Northern Luzon.
Sa situational report sa National Disaster Risk Reduction and Management Council (NDRRMC) karung adlawa Martes, Hulyo 28, kapin 6,000 ka indibidwal o kapin 1,500 ka pamilya ang nagmintinar gihapon sa evacuation center.
Nagpabilin usab sa tulo ang ihap sa mga namatay gikan Davao ug Sarangani samtang usa pa ka indibidwal ang gitahong na missing sa Sarangani.
Nagbilin usab og dakong kadaot ang bagyo sa 678 ka kabalayan.
Isip tubag, nakapang-apod-apod na usab ang panggamhanan og kapin P20 milyon nga tabang alang sa mga apektadong residente.
