BUTUAN CITY– Ming-abot na sa nasud ang unang 455,188 ka botelya sa Lamivudine, Tenofovir ug Dolutegravir kon LTD, usa ka anti-retroviral kon ARV nga tambal alang sa Persons Living with Human Immunodeficiency Virus kon mga tao nga adunay HIV sumala sa Department of Health kon DOH.
Sumala sa ahensya, nga ang maong mga tambal nasusi na ug napamatud-ang luwas, epektibo, taas og kalidad ug rehistrado sa Food and Drug Administration kon FDA, samtang gikatakdang ipang-apod-apod kini sa sunod semana.
Gilauman usab nga makompleto sa umaabot nga mga semana ang unang hugna sa pag-abot sa mga suplay, samtang ang ikaduha ug ikatulong hugna moabot sa Agosto ug Setyembre. Sa kinatibuk-an, 1.2 milyon ka botelya sa LTD ang ipadala sa supplier nga Phil Pharmawealth, bisan pa nga nalangan ang unang delivery tungod sa krisis sa Middle East.
Sumala sa DOH, ang kapin 1.16 milyon ka botelya sa LTD igo aron masuportahan ang pagtambal sa gibana-banang 97,000 ka Persons Living with HIV kon PLHIV sa tibuok nasud
