BUTUAN CITY – Suportado sa Department of Trade and Industry (DTI) ang plano nga pagtukod og liboang electric vehicle (EV) charging stations sa tibuok nasod aron mas makatipid sa gasto sa biyahe ang mga Pilipinong motorista. Gilauman nga pinaagi sa pagdugang sa gidaghanon sa charging ug battery-swapping stations, mas mu-ubos ang gasto sa pagbiyahe sa mga naggamit og electric vehicles.
Kabahin sa ilang suporta, nakigtagbo ang DTI sa usa ka EV brand aron hisgutan ang mga plano sa pagpalapad sa operasyon ug mga regulasyon nga makatabang sa pagpa-uswag sa charging infrastructure sa nasod.
Gipa-ila usab ang e-motorcycle lineup nga Evo, Feliz II ug Viper nga compatible sa plano nga pagtukod og 30,000 ka battery swapping ug charging stations sa Pilipinas aron mas mahimong sayon ug kombinyente ang paggamit sa electric motorcycles alang sa mga riders.
Gipahibalo usab nga abli ang pre-order sa maong mga modelo hangtod Hulyo 18, diin mahimo kining mapalit sugod sa ₱60,000 nga presyo ug ₱3,000 nga down payment, uban sa unom ka tuig nga warranty.
Tungod niini, gipadayon sa DTI ang pagsuporta sa tumong nga mapalapdan pa ang electric vehicle charging stations sa tibuok Pilipinas.
