BUTUAN CITY – Gipagawas na sa Quezon City Regional Trial Court Branch 98 ang warrant of arrest batok kang Vice President Sara Duterte may kalabotan sa tulo ka ihap sa kaso nga grave threats human siya gi-akusahan nga mihimo og hulga batok kang President Ferdinand Marcos Jr., First Lady Liza Araneta Marcos ug kanhi House Speaker Martin Romualdez.
Ang warrant gipagawas kaganina ug gitakda sa korte ang pyansa nga 120 mil pesos alang sa matag-usa ka ihap sa tulo ka kaso.
Sigon sa abogado ni Duterte nga si Paul Lawrence Lim, ilang gamiton ang tanang legal nga paagi nga gitugot sa balaod dayong klaro nga walay intensyon ang bise presidente nga mulikay sa balaod bisan pa sa ilang pangutana bahin sa hurisdiksyon sa korte.
Gipasaka sa mga prosecutors ang reklamo batok kang Duterte niadtong August 11, base sa findings sa National Bureau of Investigation o NBI nga gipadala ngadto sa Department of Justice niadtong Pebrero 2025.
Ang mga pamahayag ni Duterte atol sa iyang online press conferences niadtong Oktubre ug Disyembre 2024 maoy sentro usab sa usa sa mga kaso nga gilakip sa iyang ikaduhang impeachment sa House of Representatives.
