BUTUAN CITY – Dili moubos sa 32 ka tawo ang napatay samtang 16 ka uban pa ang samaron human ang usa ka bus nga puno sa pasahero nahulog sa lawom nga pangpang sa habagatang-kasadpan sa Pakistan.
Ang bus nagbiyahe gikan sa Quetta paingon sa Peshawar sa dihang naaksidente kini sa Dana Sar mountain range, nga anaa sa utlanan sa mga probinsya sa Balochistan ug Khyber Pakhtunkhwa, sa may alas-8 sa buntag oras sa maong nasud.
Sumala sa usa ka opisyal sa gobyerno sa Zhob Hospital nga dunay kinatibuk-ang 48 ka tawo, lakip na mga babaye ug mga bata, ang nagsakay sa maong bus sa dihang nahitabo ang aksidente.
Gi-imbestigahan pa ang hinungdan sa pagkahulog apan ang mga inisyal nga report nagkanayon nga duna’y problema sa manibela nga maoy hinungdan nga nawad-an sa kontrol ang drayber sa wala pa kini nahulog gikan sa kabukiran.
Ang mga litrato gikan sa dapit diin nahitabo ang aksidente nagpakita sa grabeng pagkaguba sa bus human sa pagkahulog niini ngadto sa pangpang.
Gikumpirma sa mga opisyal nga ang mga nangaangol gidala na ngadto sa District Headquarters Hospital sa Zhob, nga anaa sa may 68 kilometros (42 ka milya) ang kalayo gikan sa dapit sa aksidente.
Dose-dosenang mga emergency responder ug ambulansya ang gipadala sa dapit human sa aksidente, apan ang mga paningkamot sa pag-rescue ug pagluwas sa mga biktima hilabihan kalisud tungod sa batohon ug pangpang nga dapit.
Ang mga lawas sa mga namatay gidala usab ngadto sa ospital ug human sa pag-ila sa ilang pamilya, i-biyahe kini pabalik sa ilang tagsa-tagsa ka lungsod gamit ang ambulansya.
Sigon ni Shahid Rind, tigpamaba sa chief minister sa Balochistan, nga ang inisyal nga impormasyon nagpakita nga puno kaayu ang bus tungod kay nisakay man ang dugang mga pasahero gikan sa laing bus nga naguba sa dalan.
Si Presidente Asif Ali Zardari ug Prime Minister Shehbaz Sharif nagpadayag sa ilang dako nga kaguol ug pahasubo sa mga namatay.
