BUTUAN CITY – Padayon gihapon ang forest ug land fires sa Indonesia, ilabina sa mga bahin sa Kalimantan ug Sumatra, samtang nag-atubang ang nasud sa init ug uga nga kondisyon.
Daghang hotspots ang namatikdan sa mga awtoridad, ug ang ubang sunog nahitabo sa peatlands nga lisod palungon ug dali usab mokatap kung uga ang palibot.
Tungod niini, nakaapekto ang aso sa kalidad sa hangin sa pipila ka lugar ug adunay posibilidad nga ang haze mokatag ngadto sa silingang mga nasod sama sa Malaysia ug dinhi sa Pilipinas.
Ang Indonesian government nagpadayon sa pagpanglimpyo ug pagpalong sa mga sunog pinaagi sa pag-deploy og mga bombero, paggamit og water-bombing aircraft, ug weather modification o cloud seeding aron makatabang sa pagdala og ulan sa mga apektadong lugar.
Gisusi usab sa mga awtoridad ang pipila ka kompanya nga adunay mga concession areas nga na-apektuhan sa sunog aron mahibal-an kung adunay kalabotan sa ilang operasyon.
Bisan pa sa mga lakang sa gobyerno, nagpabilin nga dakong hagit ang pagkontrol sa mga sunog tungod sa padayon nga uga nga panahon, ug gipaabot nga mahimong kritikal ang sitwasyon hangtod sa September.
Ang sunog dili lamang hulga sa mga komunidad ug air quality, kondili naka-apekto usab sa mga lasang ug wildlife sama sa orangutans nga nagsalig sa mga kalasangan sa Borneo isip ilang natural nga habitat.
