BUTUAN CITY – Migawas sa usa ka bag-ong pagtuon nga ang anti-inflammatory diet, makatabang sa pagpa-ubos sa risgo sa dementia, ilabina sa mga tawo nga adunay Alzheimer’s pathology.
Apil sa mga pattern sa pagkaon nga gisusi sa mga tigdukiduki mao ang Mediterranean-style diet, nga nagpakita og protektibong epekto lamang sa mga tawo nga adunay ubos nga baseline levels sa Alzheimer’s biomarkers.
Nagpasidaan ang mga authors nga kini usa ka observational study nga dili makapamatuod sa epekto sa pagkaon, apan nagpalig-on sa ebidensya nga ang kalidad sa pagkaon adunay kalabotan sa kahimsog sa utok.
Ang anti-inflammatory diet mao nga ang pagkaon nga puno sa gulay, prutas, whole grains, isda, ug healthy fats sama sa olive oil nga makatabang sa pagpakunhod sa inflammation sa lawas.
Ang chronic inflammation gikutay ngadto sa daghang sakit, lakip na ang Alzheimer’s disease ug uban pang klase sa dementia.
Samtang ang Mediterranean diet usa sa labing gi-research nga diet pattern tungod kay nagpakita kini og protektibong epekto sa utok, apan sa bag-ong pagtuon, mas klaro ang benepisyo sa mga tawo nga ubos pa ang baseline biomarkers sa Alzheimer’s.
Pasabot ani, mas maayo nga magsugod sa maayong pagkaon samtang sayo pa ug dili na maghulat nga taas na ang risgo.
