BUTUAN CITY- Gisuportahan ni BB Gandanghari ang panukalang usbon ang Juvenile Justice Law aron ipaubos ang edad sa criminal responsibility gikan sa 15 ngadto sa 10 anyos, ug dayong butyag nga ang tumong niini dili ang pagpriso o pagsilot sa mga bata kondili ang paghatag kanila og kahadlok aron malikayan ang paghimo og krimen.
Sa Facebook Live ni Senator Robin Padilla, gipasabot ni BB nga ang panukala nagsilbing “deterrent” aron mahimong responsable ug mabinantayon ang mga menor de edad sa ilang mga binuhatan. Misubli ang diskusyon bahin sa maong balaod human sa insidente sa pagpamusil sa Tacloban City nga gikamatay sa tulo ka estudyante, diin si Senator Robin Padilla usa sa nag-awhag nga tun-an pag-usab ang maong isyu.
Apan, misupak ang Akbayan Party-list sa panukala ug giingong gigamit ang maong trahedya aron ipasiugda ang usa ka lakang nga dili makabenepisyo sa mga kabataan. Gawas niini, gisugyot usab ni Padilla ang pagbutang og limitasyon sa paggamit sa social media sa mga menor de edad.
