BUTUAN CITY- Nagpabilin nga kritikal ang kahimtang sa duha ka estudyante nga nalakip sa 15 ka nasamdan sa pagpamusil sulod sa San Jose National High School niadtong Lunes. Giila ang mga niini nga sila si Joan Vinias, usa ka Grade 10 student nga naigo og bala sa ulo, ug si Nathan Candelario, Grade 9 student nga naigo sa tiyan.
Sumala sa inahan ni Joan nga si Rowena Eracho, dili unta mosulod sa eskwelahan ang iyang anak tungod kay dili maayo ang gibati niini, apan nagpugos kini sa pag-eskwela. Human sa pipila ka oras, nakadungog na lamang siya sa trahedya ug nakita ang iyang anak nga naghigda sa stretcher sa ospital.
Samtang si Nathan, sumala sa iyang amahan nga si Erwin, grabeng naangol human ang balang miigo ilawom sa pusod ug migawas sa kilid sa lawas, nga nakahimo og tulo ka buslot sa iyang tinai. Sa kinatibuk-an, 15 ka estudyante ang nasamdan ug tulo ang namatay sa insidente. Sigon sa kapolisan, ang mga suspek nag-edad og 14-anyos ug 15-anyos ug sa kasamtangan anaa na sa kustodiya sa mga awtoridad.
Ang 15-anyos nga suspek giatubang sa kasong murder ug frustrated murder human matukib nga nakasabot kini sa iyang gibuhat. Samtang nagpadayon ang imbestigasyon, nanawagan ang mga pamilya sa mga biktima og hustisya ug pagpanubag sa tanang responsable sa maong duguong panghitabo.
