BUTUAN CITY – Mibuswak ang sulod ug gawas nga bahin sa municipal gymnasium sa lungsod sa Talacogon, Agusan del Sur sa katapusang vigil alang kang Rene Clert ‘Bobet’ Baterbonia kagabii.
Kini tungod sa pagdagsa sa grabe kadaghan sa iyang mga supporters gikan sa managlahing parte sa nasud aron muhatag sa ilang katapusang respeto ngadto sa late MVP adiser siya ilubong karong buntag.
Masaksihan ang paghilak ug ginaksanay sa mga tawo uban sa mga pag-ampo ug pagpanamilit samtang ang iyang pamilya, mga higala, ka-ubanang mga atleta, mga supporters, ug mga membro sa komunidad, naghi-usa sa katapusang higayon aron pasidunggan ang iyang kinabuhi nga naghatag og kadasig sa kadaghanan.
Gisira ang gym pasado alas-dose sa tungang gabii kagabii aron mahatagan og pribadong oras ang pamilya Baterbonia uban sa ilang mga kabanay aron ma-solo ang haya sa AgSurnon athlete icon.
Pasado alas-siete ning buntaga himuon ang misa sulod sa gym adiser ihatud sa iyang katapusang pahulayanan si Bobet sa Talacogon Memorial Park nga gi-cordon nang daan tungod kay napuno na usab kini sa mga tawo sukad pa ning mi-aging mga adlaw.
Tungod kay gikapoy ug hago na kaayo ang iyang pamilya, ang lokal nga kagamhanan na sa Talacogon ang magdumala sa paglubong. Tungod usab sa gila-umang pagdagsa pa sa daghang mga tawo, mas gipahugtan pa ang seguridad sa gym ug sa lubnganan aron masiguro ang hapsay nga pag-accommodate sa mga bisita.
