BUTUAN CITY– Gideklarar sa Philippine Army nga anaa na sa Stable Internal Peace and Security ang tibuok Caraga Region, usa ka mahinungdanong lakang padulong sa tumong nga mahimong hingpit nga insurgency-free ang rehiyon.
Sumala ni Lt. Col. Joe Patrick Martinez, tigpamaba sa 4th Infantry Division sa Philippine Army, nga anaa na sa Stable Internal Peace and Security ang rehiyon ug hapit na kini sa insurgency-free status, kung asa nagpakita og dako nga kalampusan sa kampanya batok sa insurgensya sa rehiyon.
Gipasabot usab ni Martinez, nga sa pagkakaron ang Surigao del Norte pa lamang ang opisyal nga nadeklarang insurgency-free, apan tungod sa positibong rekomendasyon sa Regional Peace and Order Council, mga local council sa matag probinsya, ug sa mga ahensya sa seguridad lakip ang Armed Forces of the Philippines, Philippine National Police ug Philippine Coast Guard, hingpit nang ideklara karung Hunyo 18 ang tibuok Caraga nga Stable Internal Peace and Security.
Sigon pa niini, nga kini resulta sa daghang katuigan nga paningkamot sa gobyerno ug mga pwersa sa seguridad sa pagsugpo sa armadong kalihokan sa mga rebelde, ug sa ilang pagtan-aw nga wala na’y aktibong presensya sa New People’s Army (NPA) sulod sa rehiyon, nga maoy nakahatag og mas luwas ug malinawon nga kahimtang alang sa mga komunidad ug mga lumulupyo sa Caraga.
