BUTUAN CITY- Gikondena ni Volt Bohol, Presidente sa August Twenty-One Movement (ATOM), ang padayon matud pa nga lihok sa kampo ni Senator Alan Peter Cayetano nga nagmugna og kagubot ug kawalay kalig-on sa politika sa nasud, samtang nag-atubang ang katawhan sa krisis ingon man sa pagsaka sa presyo sa mga palaliton ug gasolina.
Sumala ni Bohol, ang Senado kaniadto giila isip usa sa katapusang kuta sa demokrasya, apan sa kasamtangan nagkalain na ang kahimtang sukad sa pagpangulo ni Cayetano. Sigon usab niini, nga ang kampo sa ATOM nag-ila kang Senator Sherwin Gatchalian isip lehitimong Senate President human sa giingong re-organisasyon sa Senado, ug iyang gipasiugda nga adunay mga nag-unang pananglitan sa kasaysayan diin igo na ang 12 ka boto aron mapahigayon ang maong re-organisasyon, sama sa panahon sa pagpangulo ni Franklin Drilon sa tuig 2012.
