BUTUAN CITY- Gitan-aw sa Criminal Investigation and Detection Group (CIDG) ang posibleng kaso sa homicide ug paglapas sa Anti-Hazing Act human sa pagkamatay sa duha ka Ateneo basketball players nga sila si Rene Baterbonia ug Divine Adeli, kinsa nalumos atol sa team-building activity sa Dipaculao, Aurora niadtong Hunyo 8.
Gikwestyon usab ni CIDG Director PMGen. Robert Morico II ang kahimtang sa kaluwasan sa aktibidad, lakip na ang pagpili sa lugar nga nailhan nga kusog ang balod ug ang kwalipikasyon sa mga training staff.
Misumiter og resignasyon si head coach Tab Baldwin ug team manager Epok Quimpo samtang nagpadayon ang CIDG ug NBI sa imbestigasyon aron masuta ang responsibilidad, lakip na ang papel sa usa ka foundation nga nagdumala sa programa sa basketball. Gitagaan og subpoena ang mga opisyal sa team ug giasoy nga magpagawas og immigration lookout bulletin batok sa mga giimbestigahan.
