BUTUAN CITY – Daghang butang ang gila-uman nga makita sa usa ka supermarket, apan ang usa ka dako nga bato dili gayud usa sa mga niini. Apan didto sa Estonia, usa ka supermarket ang duna’y usa ka dako nga bato nga adunay gihabugong 22-metros ug gilapdon nga 6-metros apil na ang bahin nga gilubong sa yuta kansa nahimong atraksyon sa kadaghanan sa mga mamalitay.
Ang maong bato, dugay na sa wala pa magplano ang mga tag-iya sa shopping center – ug gibana-banang 10,000 ka tuig nang nagtunhay apan nadiskobrehan lang kini sa dihang nag-ukay sila sa site.
Sa sinugdan, tuyo unta sa mga trabahante nga tipakon kini, apan gisupak kini sa mga lokal, tungod kay usa diay kini ka erratic boulder nga angay protektahan.
Ang mga erratic boulder mao ang mga bato nga gihulma sa glacier, gidala sa lain nga dapit sulod sa taas nga panahon, ug gibiyaan dihang natunaw ang glacier.
Kasagaran lahi ang komposisyon niini kumpara sa lokal nga mga bato, ug naghatag kini ug bililhon nga mga timailhan sa geology bahin sa mga glaciers ug nangagi nga ice age.
Karon dili mahimo nga ang mga mamalit sa supermarket dili magpahulagway o kaha magpakuha og video sa maong higanteng bato.
