BUTUAN CITY- Gibantog ang Bombo Radyo Philippines nga Best Radio Network sa Pro Patria Journalism Awards nga gihatag sa Rotary Club of Manila atol sa selebrasyon sa Araw ng Kalayaan kagahapong adlawa Hunyo 11, 2026 sa Makati City.
Gipanghimatuud sa citation ang dugay na nga paningkamot sa Bombo Radyo sa paghatag og kasaligan nga balita, impormasyon, ug serbisyo publiko sa mga Pilipino, ilabi na sa panahon sa bagyo, kalamidad ug emerhensya. Giila usab ang kusog nga presensya sa network sa mga probinsya ug ang community-focused programming nga naghatag og timely news ug public service.
Ang Pro Patria Journalism Awards, nagpasabot og “For Country,” kansa gi-ila nga usa sa pinakaprestihiyosong journalism honors sa nasud, ug nagpasidungog sa mga media nga nagbarug sa kamatuoran, demokrasya, ug patriotismo. Ang maong dungog nagpalig-on sa misyon sa Bombo Radyo nga magpadayon sa responsable nga pagbroadcast ug pagserbisyo sa katawhan pinaagi sa 32 ka digitalized AM ug FM stations sa tibuok Pilipinas.
Sulod sa kapin unom ka dekada sukad sa pagtukod niadtong Hulyo 6, 1966, ang Bombo Radyo nahimong kasaligan nga kauban sa mga Pilipino sa panahon sa kalampusan, krisis ug kausaban, ug nakahatag og direkta nga balita gikan sa Malacañang ug Metro Manila ngadto sa mga probinsya bisan sa panahon sa Martial Law. Luyo sa maong kalampusan mao ang liderato ni Dr. Rogelio M. Florete, Chairman sa Florete Group of Companies, nga adunay daghang interes sa media, banking, tubig, property development, pawnshop and jewelry, aquaculture and agriculture ug uban pa.
