BUTUAN CITY – Naghatag ang Bombo Radyo Philippines Foundation Incorporated ang gatusang sako sa bugas sa mga naapektuhan sa linog sa General Santos City.
Kaganinang buntag gihatod kloini sa parokya diin gipadayag ni Fr. Stanley Dalagon Baldon, Parish Priest sa Holy Cross Parish sa Barangay Calumpang, ang dakong pagpasalamat sa pag-abot sa 400 ka sako sa bugas nga donasyon alang sa mga residente nga naapektuhan sa kusog nga magnitude 7.8 nga linog sa milabayng mga adlaw.
Matud ni Father Baldon, usa ang Barangay Calumpang sa labing grabeng naapektuhan sa linog diin daghang mga pamilya ang nakasinati og kadaot sa ilang panimalay ug panginabuhian.
Tungod niini, dako kaayo ang ilang kalipay ug pagpasalamat sa paghatag sa maong ayuda nga makatabang sa mga apektadong komunidad.
Gipasabot ni Fr. Baldon nga ang donasyon sa bugas moabot sa liboan ka mga benepisyaryo sa barangay ug sa ubang mga residente nga nanginahanglan og suporta human sa kalamidad.
Dugang pa niya nga dako kini nga kahupayan alang sa mga pamilya nga naglisod karon sa pagpangita og pagkaon ug uban pang batakang panginahanglan.
Ang 400 ka sako sa bugas gidonar sa Bombo Radyo Philippines Foundation Inc. ‘Oplan Kabalaka’ isip kabahin sa ilang relief response alang sa mga biktima sa linog sa General Santos City.
Ang maong donasyon gitunol sa Holy Cross Parish nga maoy motabang sa pag-apod-apod niini ngadto sa mga kwalipikadong benepisyaryo.
