BUTUAN CITY – Misaka na sa 45 ang ihap sa mga namatay sa Mindanao human sa magnitude 7.8 nga lindog niadtong Hunyo 8, 2026, sumala sa pinakabag-ong report sa Office of Civil Defense (OCD).
Lakip sa mga bag-ong narekord nga biktima ang pito gikan sa lungsod sa Jose Abad Santos ug usa gikan sa Malita sa Davao Occidental.
Gawas niini, 17 pa ka tawo ang gikataho nga missing o nawala, lakip ang upat gikan sa Glan, Sarangani ug upat gikan sa General Santos City.
Sobra 450 ka indibidwal usab ang nangaangol ug gibanabanang 35,673 ka pamilya gikan sa 199 ka barangay sa Regions 11, 12, 9, ug BARMM ang naapektuhan sa kalamidad.
Nagpadayon ang search and rescue operations diin kapin sa 3,700 ka uniformed personnel gikan sa Philippine Army, PNP, BFP, ug Coast Guard ang gipang-deploy, gamit ang 21 ka air ug sea assets para sa relief ug pagbiyahe sa mga supplies.
Natala usab ang kadaot sa 3,169 ka kabalayan, lakip ang 528 nga hingpit nga naguba, ug gibanabanang 562.8 milyones pesos ang kantidad sa kadaot sa imprastruktura sama sa 29 ka dalan, 11 ka tulay, ug pasilidad sa General Santos Airport.
Kapin sa 1,953 ka aftershocks ang natala gikan Hunyo 8 hangtod Hunyo 10, nga adunay kakusgon gikan magnitude 1.2 hangtod 6.4. Tungod niini, nagpabiling suspendido ang klase sa Regions 11 ug 12, apil na sa pipila ka bahin sa Region 9 ug BARMM.
Nag-deploy ang Department of Information and Communications Technology (DICT) og mga Starlink satellite internet units aron masulbad ang problema sa komunikasyon sa mga hilit nga dapit.
Samtang, nakahatag na ang Department of Social Welfare and Development (DSWD) og hapit 4.8 milyones pesos nga kantidad sa pagkaon ug non-food items sa mga apektadong pamilya.
Padayon nga gipahinumdoman ang publiko nga mag-andam og go-bag, sayron ang mga evacuation route, ug maminaw sa opisyal nga pahibalo sa OCD ug PHIVOLCS.
Gitambagan usab ang mga residente nga magmabinantayon sa mga aftershocks ug posibleng lokal nga tsunami.
